زبان ءِ وانگ ءَ ھیل کن

راج ءِ بدبھتی اِنت کہ مئے راج ءِ ورنا مرچی ماتی انامت ءُ راجی پَجّار بزانکہ وتی راجی زُبان بلوچی ءِ وانگ ءُ نبشتہ کنگ ءَ ھیل نہ اِنت۔ انچوشکہ کہ دگنیا ءِ دگریں راجانی وڑ ءَ بلوچ ھم یک زندگیں راجے ءُ بلوچی آئی ءِ راجی زُبان اِنت۔ اگاں ما راجی زبان ءِ یک گالرِدے شَر نبشتہ کت کن ایں گُڑا ما منّ ایں کہ ما بلوچ ایں چمیشکا دری راج ھم مارا راجے منّ اَنت۔ البت تو دلجم بِہ بَہ ئے کہ بے زبان ءَ تو گُنگے زانگ بَہ ئے، دگریں زباناں ھبر کن ئے گُڑا تو گار ئے، ترا ھچ کسے نہ منّ ایت پمیشکا باید انت ما وتی راجی زبان ءَ ڈالچار مہ کن ایں بلکیں وانگ ئِے ھیل کن این ءُ راج ءِ تہ ءَ ھم زُبان ءِ بابت ءَ آگاھی ءُ سرپدی بیار ایں کہ ما بلوچ ایں ءُ ماتی زبان بلوچی ءَ وت بِہ وان ایں ءُ نبشتہ بِہ کن ایں ءُ دیم ءَ ھم سْیاد ءُ وارساں وانین ایں۔ انچوشکہ دگریں زبانانی وڑ ءَ بلوچی زبان ھم یک پیلوئیں زبانے ءُ آئی ءِ ھم گال ءُ لبز چہ دگریں زباناں جتا ءُ زگر اَنت پمیشکا بلوچ ءُ بلوچی چہ دگریں زباناں ھچبر وازمندگ نہ اَنت۔

چوناھیگا ما وَ بلوچ ایں، گِند ئے ما وَ دگریں زبانے وانگ ءَ نہ ایں کہ ما ونت ئِے نہ کن ایں یا زاناں سرپد بیگ ءَ وھد لگ ایت ئِے یا گْوش ئے ما بلوچی وانگ ءَ تکانسر بَہ ایں بلکیں وتی جِند ءِ ماتی زبان ءِ وانگ سَک آسان اِنت ءُ ھر بلوچے وتی ماتی زبان ءَ وت ونت کنت بس پہ ماتی زبان ءَ کمیں مھر لوٹ ایت، راجدوستی ءُ زُبان دوستی لوٹ ایت ءُ راج ءِ نودربراں دلبڈی دیگ لوٹ ایت کہ ما پیسر بلوچی درونتاں وان ایں پد ءَ وت ھمے وڑیں درونتاں وت ھم جوڑ کن ایں ءُ راج ءَ ھم وانین ایں پرچاکہ چہ وانینگ ءَ ما وت بلوچی شر دربر ایں ءُ مارا راست نبیسّگ ءَ زبری بیت۔

مرچی اگاں شُما بلوچی زُبان ءِ تندجاہ ءُ پیسبُک ءِ تاکدیم برو ات یا بلوچی وٹس ایپی وانگجاھاں چار اِت کہ اود ءَ بے کساسں بلوچی درونت، راجدوستی نبشتانک ءُ آزمانک پہ وانگ ءَ رس ایت۔ ھمُک روچ اود ءَ نوکیں نوکیں نبشتانک توری چاگرد ءِ بارہ ءَ بِہ بیت یا توری میان اُستمانی تب ھر وھد ءِ بارہ ءَ بہ بیت، چہ اود ءَ شِنگ بنت۔

اولی بر ءَ مارا وتی گْوانکوانی تہ ءَ سید گنج بزانت بلد ءُ بلوچی آبنیکدار ءِ پریاماں(آیپ) ایرگیج کنگی اِنت۔ پد ءَ چہ تندجاھاں بلوچی نبشتانک وانگ ءَ ھیل بہ کن ایں کہ ما زان ایں کہ بلوچی چون وانگ بیت۔ بزاں اگاں ما سَے روچ پہ زُبان دوستی نبشتانکانی وانگ ءَ بِہ دے ایں ءُ وانگ ءِ ساھت ءَ لبز ءُ گالے ءِ بزانت ءِ سما مہ بیت گڑا ما ھمائی ءِ بزانت ءَ چہ بزانت بلد ءَ درگیج ایں۔ اِے ھم بلوچ راج ءِ وش بھتی اِنت کہ مرچیگیں وھد ءَ بازیں بلوچ زبان دوستاں بلوچی وٹس ایپی وانگجاہ اڈ کتگ اَنت ءُ چہ اود ءَ شپ تاں روچ بلوچی زبان ءِ جُھدکار پہ راجی زبان ءِ دیمروی ءَ جنُزان انت، اود ءَ وانگجاہ ءِ باسکاں بلوچی دَرونت ھم وانینگ بنت، پد ءَ باسک آزمانک ءُ نبشتانکانی نبیسّگ ءَ ھم ھیل کنائینگ بوگ ءَ اَنت۔

مرچی اگاں ما وتی سنگت، دزگْوھار، سْیاد ءُ وارسانی وٹس ایپی گَلانی تہ ءَ کلوہ ءُ پیگاماں بلوچی زبان ءَ نبیس ایں گُڑا اے ھم پہ ما بلاھیں وش بھتی یے بیت ءُ راجی زبان دیمروی کنت۔ سَک بژن ءُ ھپ اِنت کہ بلوچ مرچاں وتی وٹس ایپی کلوہ ءُ پیگاماں ماں ھندی ءَ راہ دے انت بلے بلوچی ءَ دیگ ءَ آئی ءَ لج بیت۔ باید اِنت نی ما آگاہ بِہ بَہ این ءُ وت سما بہ کن ایں کہ ما وت یک جتائیں راجے ایں ءُ مارا یک پیلوئیں زبانے گوں سرجمیں نبشتہ رھبند ءَ ھست پمیشکا ما چہ ھندی ءُ پارسی ءَ ھچبر وازمندگ نہ ایں۔ ما وتی راجی زبان ءَ بہ وان این ءُ نبشتہ بِہ کن ایں۔
یک رَندے پد ءَ من بلوچ برات ءُ دزگْوھاراں دزبندی کن آں کہ شُما وت ماتی زبان ءَ بہ وان اِت ءُ پد ءَ وتی نیمگ ءَ وٹس ایپی بلوچی وانگجاھاں ٹھین اِت ءُ سْیاد ءُ وارساں بلوچی ءَ وانین اِت کہ گوں وانینگ ءَ شمئے تہ بیسہ(Confidence) ودی بیت

برات ءُ دزگْوھاراں ھست بات اِت ءُ پہ راجی زبان ءِ دیمروی ءَ دیم ءَ جُنزان بات ات