وھد ءِ ھمراھی ءَ دربر ایں!

وھد ءِ ھمراھی ءَ دربر ایں!
نبشتہ کار: رُکسار بلوچ ءُ بانڑی بلوچ

دْراھیں بنی آدم یکیں تب ءِ وَ نہ اَنت، اگاں ما وتی چاگِرد ءِ تہ ءَ ھورت چاری بہ کن ایں گُڑا مارا جُھدکار، بے پرواہ، وتواہ، ابدال ءُ دلپروشیں مردماں ھوار لھتیں انچیں مردم ھم گِندگ ءَ کیت کہ آ کس ءَ دلگوش نہ اَنت۔ ھمے وڑیں مردم میشین ءِ وڑ ءَ آٹو سسٹم اَنت۔ اگاں تو اے وڑیں مردماں پنت ءُ سوج بہ کن ئے گُڑا کس ءَ دلگوش نہ کن اَنت بلکیں پسو دے اَنت “ما توری رَد ایں یا شر ایں وھد ءِ ھمراھی ءَ ما شر بہ ایں، تو سرپدی دیوک کَے ئے؟”

بزانکہ کَسے ءِ جُھد ءَ آسان کنگ ءُ آئی ءِ سرسوج کنگ ءَ ھم مردم بد پھم اَنت۔ شر اِنت کہ وھد ءِ ھمراھی ءَ بنی آدم شر بیت بلے اِے وڑیں مردم بے رھشُون ءُ بے سروکی ءَ یکشل ءَ چہ وتی رَدی ءُ تاوان بار بار بنت۔ ما وَ منّ ایں کہ بنی آدم ءُ نودربر وھد ءِ ھمراھی ءَ ھیل کنت ءُ شر بیت بلے ھمے میان ءَ آئی ءَ درس ءُ پنت ھم دلگوش کنگی اَنت۔ آئی ءَ یکشل ءَ وتی ھم پھمگ ءُ راست کنگی اَنت کہ بنی آدم ءَ مُدام چہ وتی رَدیاں دربُرتگ۔ گِند ئے پاکیں ھُدا ءَ بنی آدم ءَ اگل ءِ وڑیں دادے ھم داتگ باید اِنت ما کمیں وتی اگل ءَ ھم کارمرز بہ کن ایں ناں کہ تھنا وھد ءِ سر ءَ اُمیت بدار ایں کہ وھد من ءَ وت شر کنت۔ گِند ئے بلوچی مئے وتی جِند ءِ راجی ءُ ماتی زُبان اِنت پمیشکا بلوچی وانگ ءُ بلوچی نبشتہ دربرگ پہ بلوچ ءَ سک آسان اِنت پمیشکا ما گْوش ایں کہ پہ بلوچ ءَ بلوچی وانگ ءُ راست نبیسّگ ءِ ھیل کنگ ءَ جُھد نہ لوٹ ایت بلکیں گوں بلوچی ءَ مھر لوٹ ایت۔

اگاں ما وت ءَ زُبان دوست ءُ راجدوست گْوش ایں گُڑا مارا بلوچی وانگ ءُ دربرگی اِنت۔ اگاں بلوچ راج ءِ وانِندھیں زُبان دوست ءُ راجدوستیں بْرات ءُ گْوھار وتی راجی زُبان ءَ دربرگ لوٹ اَنت گُڑا باید اِنت آ اشتاپ مہ کن اَنت بلکیں اول بلوچی درونتاں(سبق) بہ وان اَنت ءُ پد ءَ کم کم ءَ راست نبیسّگ ءَ روان بہ بنت۔ ما تھنا یک گپے دلگوش بہ کن ایں انچوشکہ انگریزی ءُ دُنیا ءِ دِگہ زُباناں Helping Verbs ءُ Adjectives بنت ھمے وڑ ءَ بلوچی ءَ ھم کُمکّارگال ءُ رنگ گال ھست اَنت۔ گُڑا باید اِنت ما اول بلوچی زُبان ءِ اِے وڑیں چیزاں دلگوش بہ کن ایں۔ نی شُما جُست کن اِت کہ بلوچ یک گُلامیں راجے پمیشکا بلوچی ماں وانگجاھاں وانینگ نہ بیت گُؑڑا بلوچی دَرونت چہ کُج ءَ رس اَنت؟

ایشی ءِ پسّو ایش اِنت کہ اگاں ما پیسبوک ءَ کارمرز کنگ ءَ ایں گُڑا مارا پہ بلوچی وانگ ءُ دربرگ ءَ سک باز تاکدیم(پیج) ءُ گل(گروپ) رس ایت باید اِنت شُما اے بلوچی دربرگ ءِ گلاں ھوار بِہ بَہ اِت۔ مرچاں بازیں بلوچ زُبان دوستاں وٹس ایپی وانگجاہ اڈ داتگ اَنت گُڑا شُما ھمے وٹس ایپی وانگجاھاں ھوار بَہ اِت ءُ چکاساں بھر بہ زُور اِت۔ یوٹیوب ءَ ھم بلوچی دَرونت رس اَنت گُڑا چہ یوٹیوب ءَ ھم کُمکّ بہ زُور اِت۔ گِند ئے یک روچے ءِ تہ ءَ پکیر مُلا جوڑ نہ بیت پمیشکا ما وَ کس ءَ نہ گْوش ایں کہ یکپارگی یکیں روچ ءَ بلوچی ءِ دْراھیں درونتاں بوان اِت یا ویڈیواں بچار اِت بلے ما گوں شُما دزبندی کن ایں کہ ھر روچ بلوچی الم بوان اِت توری آ درونتے بہ بیت یا توری زُبان دوستی ءُ راجدوستی نبشتانکے بہ بیت!

گُڈی ما اِے جھل ءِ نبشتگیں پنت ءُ سوجاں ھم دلگوش بہ کن ایں۔

1- شُما اول کسانیں بلوچی دَرونتاں بہ وان اِت ءُ پد ءَ وت ھمے وڑیں کسانیں دَرونتاں ھیل (پریکٹس) بکن اِت، بزانکہ مارا وت ھم ھمے وڑیں بلوچی کسانیں درونتاں نبشتہ ءُ تیار کنگی اَنت۔ بِل اِت کہ سَے گالرِدی بہ بنت۔

2- رَند ءَ ما کسان کسانیں زُبان دوستی ءُ راجدوستی نبشتانک ءُ آزمانکاں وت نبشتہ بہ کن ایں، نودربراں ھم بوانین ایں ءُ آیانی رَدیاں راست بہ کن ایں۔

3- وتی نبشتگیں گالرِد(جملہ) ءُ نبشتگیں نبشتانکاں دوبر چمشانک دیان ءَ وت راست بکن ایں کہ ماں دُنیا ءَ ھر زبان ءِ نبشتہ کار وتی چیزاں دوبر وت وان اَنت ءُ شر کن اَنت۔

وھدے کہ ما اِے سے ئیں کاراں ھیل کن ایں گُڑا وت دربر ایں بلکیں ما ھر کس راجی زُبان ءِ اُستاد جوڑ بَہ ایں۔

بلوچی مئے وتی شھدیں زُبان ءُ بلوچ راج ءِ پجّار اِنت، بلوچی وت وان اِت ءُ بلوچی وٹس ایپی وانگجاھاں اڈ دیان ءَ وتی لوگ ءِ مردم، سْیاد، سنگت ءُ وتی دزگْوھاراں ھم بلوچی بوانین اِت۔ بلوچی ءُ بلوچ شالا دیمروی بکنات۔ شالا انچوش بات۔