in , ,

آزمانک:دمبّیگ آزمانکار:غنی پہوال

آزمانکار:غنی پہوال

غنی پهوال
غنی پهوال

آزمانک:دمبّیگ

آزمانکار:غنی پہوال

ہینّاریں زمین ءِ تَلکاریں سینگ ءَ گیمُرتگیں درچک ء ُ دار، مال ء ُ دلوت ، گریشگی رستر ء ُ آھوانی چّم دائم بُرز ءَ درنگ بیتگ انت، گم جتیں بنی آدم نا اھلاجی ءَ کُشتگیں پَسانی بردستاں ہور ءِ مستاگ ءِ شوھازگ ءَ بے وس۔بلے بے ھاجتیں جمبر مدام چو مجازیں کاڑاں بے کِماری سوکلو دیان گوستگ ات انت۔پُرّیں پنچ سالاں پد مرچی ھُشکاوگیں زمین ءِ کلنڈیں نُکّ پہ مرادے تَرّ بیگ ءَ ات۔آپُستگیں جُڑاں پہ گومے بند وارتگ ات۔ گِروکانی شہم ہر چہار پھناتاں پد ماں پد چیلک وران ات۔ گرندانی جگر سندیں کٹاکگاں گوں رگام شَل ماں شَلءَ تُنّاپیں زمین ءِ برھنگیں پھنات ءَ چو الگریں بورانی پادتراپاں درد وران ات انت۔لُڈیں نوکاپ کوہانی تامپاں ایر لَگُشان چہ آپ شونانی رہ ءَ شُتور گران مزن گَر ءِ جہلیں کُمب ءَ ژیمب ژیمب ءَ ایر رچان ات انت۔کُتبی کَنَک ءِ کٹّیں تلار ءِ بُرزی ترکّاں گُگوے ءَ سر درآورتگ ات ء ُ چمّ ئے پہ روچ ایرشُتی نیمگ ءِ جہلگ ءَ گیڑیں داز ءِ کش ءِ تلمب ءَ نز کُرّتگیں مرد ءَ درآورتگ ات انت۔
گُرکی ئیں تُپنگے آئی ءِ بز رانانی شم ءَ ات ء ُ گَلوئے راستیں کوپَگ ءَ تکہ ات۔دیم ءِ رو ءَ ھمپُستگیں تلارے ءِ مُچّیں سنگانی گور ءِ گرندیں زمین ءَ آپ بُڑ بُڑوکی وران پچیں ترکّاں انچو ایرروان ات گشئے اے تُن پالیں زمین ءِ ہلاہوشی گیدی ءَ ہر آپ ئے کہ است انت درستاں یکپارگی ایربرگ لوٹیت۔ تلمب ءِ تہہ ءَ نز کُرّاتگیں مرد ءِ بے تاہیریں چمّ گرندیں زمین ءِ ہمے لُردیں بُڑ بُڑکیاں سک ات انت۔آئی ءِ گاریں ھیال چو زر ءِ چہرآپ ءَ چہر وران ات۔ ھیالانی تل ماں تلیں پَرتکاں آ وتی زند ءِ یک سیاہیں شپے گیر آرگ ءَ ات۔
آ یک شرتگیں شپے ات۔گروک سہت ء ُ دمان شہم وران ات، بنی آدم ءِ کُنٹ گندیں کردانی گَم ءَ جمبر رگامی دروشم ءَ مرچیگیں رنگ ءَ پہ کُہتے ارساں شلان ات انت۔آئی ءِ گُدپہک میچل اتگ ات انت، سارتی ءَ آسک بے وار کتگ ات بلے انگہ گاماں پہ ترندی وتی کاپر ءِ نوان ءَ شہار دیان ات، وہدے آ کاپر ءِ نزیک ءَ سر بیت تہ آئی ءِ پاد چو کاپر ءِ مِنُک ءَ زمین ءَ مہہ بیت انت۔ یک اناگہ ءَ کوریں گیرت ءِ مست ء ُ بے ہوشیں لیڑہ ءَ نازاکیں زند ءِ گُل گرکیں کشار بے بزگی یک دست ءَ لپاشت۔۔۔۔۔۔۔۔
مرچیگیں بیگاہ ء ُ آ شپ ءِ میان ءَ پُریں پنچ سال گوستگ ات کہ آ کوہ پہ کوہ باروٹی اتء ُ آئی ءِ زند گوں ہمے تہلیں ھیال ء ُ وسواساں شپ جاہ ء ُ روجاہی گوزان ات۔مرچی پد ءَ آ چو دیر بُنیں چاتے ءِ چِکّی وارتگیں شیماز ءِ براگاں کیک وران ء ُ پچ رچان اتء ُ ملک ناز ءِ پُر بژنیں چیہال آئی ءِ ھیالانی درنگیں گراں چو رود ءِ توار ءَ وار وار ءَ پسّو دیگ ءَ ات۔
” مراد۔۔۔۔۔۔مراد! چے کارے کت تو۔۔۔۔۔دریگتیں جُست کُتیں۔۔۔۔۔مراد۔۔۔۔۔۔مراد!!۔۔۔۔۔“
آ گُش ئے چو پُرشتگیں بوجیگے ءَ بے کراری زرد ءِ وسواسانی زر ءَ زیرآپ بیان ات۔اناگہ آئی ءِ ھُشک ء ُ تل بستگیں لُنٹاں لرزگے بنا بیت۔ آ گوں وت سوڑگ ءَ ات۔” انّاں، چو بیت نہ کنت۔ انّاں۔۔۔۔۔۔چمّ دروگ نہ بند انت، چمّ۔۔۔۔۔۔“
آ وت ءَ چہ بژن ء ُ بش بش ءِ تہہ کُشیں مارشت ءَ رکینگ ءَ وت جَنَگ ء ُ وت مانا کنگ ءَ ات۔بلے بُن در ءَ آ یک مزن تورشتیں پگری بہہ ء ُ بکّڑیں ازابے ءِ کورہ ءَ سُچان ات۔
آئی ءِ مات ء ُ پت کسانی ءَ بیران بییگ ات انت، آ ء ُ آئی ءِ کستریں گوہار شدری وتی ناکو بالاچ ءِ لوگ ءَ رُستگ ء ُ مزن بیتگ ات انت۔شدری رنگ ء ُ دانگ ءَ بے درور ات۔دپ ئے دائم پُر ء کندگ ات بلے آئی برات ءَ چہ تب ء ُ آدت ءَ چَٹ وتی ناکو بالاچ ءَ کش اتگ ات، آ یک گرم سریں ورناے ات، آئی ءِ نندگ ء ُ پاد آہگ،گپ ء ُ ھبر،مزن مردی ء ُ ماں میاتکی ءِ شون دار ات انت۔
ہمینچک ءَ گوات ءِ ترندیں ھینژابے ءِ ہمراہی ءَ لہتیں ترمپاں آ چہ گاریں ھیالاں پچ درہینت،گوں سارتیں گینے ءَ آئی ءَ دپ ء ُ دیم پہک کُت انت،۔ سہتے ءَ پد رگاماں ہم تم کُتگ ات، جمبر ہم تَنَک تر اتگ ات انت، روچ ءِ نُگرہیں برانز چہ جمبرانی پچیں شماں میس اتگیں
مین ءِ برپیں سینگ ء َ سیکان ات انت، آ چہ تلمب ءَ در کپت، سُران سُران وہدے چپی کنک ءِ جمپ ءِ سِریگ ءَ پرترّگ ءَ ات تہ آئی ءِ چمّ گور دیم ءَ لونجانیں انجیرے ءَ کپت انت کہ ہمے آپ آئی ءِ سبزی ء ُ میزری ءِ مانزمان ات مرچی ہمے آپ ءَ آئی ءِ سر روتگ آپشونانی ترندیں روہانواں گوں گوتکگ ات انت تہنا مات روتگ ءَ داشتگ ا ت پمیشکہ انجیر پہ بے وسی گوات ءِ ترندیں شیکگانی دیمپان ات ء ُ برے دیم ے لُڈگ ءَ ات۔ہمے انجیر ءِ پتنیں تاکاں آئی ءَ تاکے سست ء ُ گوں مزن بوگیں لنکُکاں لتاران ءَ رہادگ بیت۔آ تَنگے زمین ہم نہ شتگ ات کہ چمّ ئے پہ یک سوتکالیں جمپے ءِ بگل ءَ لہتیں سنگانی بانڈماں کپت انت، مستریں بانڈم ءِ پھنات ءَ رُستگیں ایشرک ءِ گور ءَ آشُت ء ُ نشت، بانڈمانی چارگ ءَ دلگوش بیت، اناگہ آئی ءِ چمّ سنگانی نیام ءَ بنی آدمی ریزتگیں کامپولے ءَ کپت انت،کامپول آئیءَ زرت دستانی دل ءَ کُت ء ُ ھیرت ھیرت ءَ چارگ ءَ لگ اتئے۔
بانڈم،پُرشتگیں سنگ ء ُ ریزتگیں کامپول اے دَمگ ءِ گوستگیں زند مان ءِ نشان ات انت کہ چہ گژن ء ُواری،بے اِزتی ء ُ چمداری ءِ بدل ءَ مرگ اش امباز اتگ ات۔ ننگ پہریزوکیں رپتگیں مردانی اے دمب مرچی بہاری رگاماں یک دست ءَ تل اتگ ات انت۔
آئی ءَ میزاں میزان ءَ کامپول پدا سنگانی نیام ءَ ایر کُت ء ُ پیشی شائیرے ءِ اے گال پہ بژن دپگال کُت۔
سال پہ سال کاینت ء ُ رونت امبوئیں بہار
ہچ دوبر پیداک نہ بنت دمبانی میار
ہمینچُک ءَ بینگے ءِ وکگ ءَ آ ڈاہ دات، آئی ءَ گوش پہ ہمے توار ءَ رُپت انت۔ کلہے ءَ پد بینگ ءَ پد ءَ وک ات۔ آ ہمے توار ءَ گوش گران گوریچانی بند ءِ درپ ءَ لک کپت ء ُ درپ ءَ ہما دیم چارگ ءَ لگ ات۔
کوہ ءَ آ دیم کورے ات، کور ءِ ہما نیمگی دست ءَ سند ءِ سر ءَ بزیں چگردانی ایر گوات ءَ دو گدان مک ات انت، تلگیں شیپے ءِ لاپ ءَ بینگے بّریں ترشترے ءَ پہ گدان ءَ سر دیان ات، چگردانی نوان ءِ پسانی تند ءَ جنینے ءَ پَسے پُرگ ءَ گپتگ ء ُ بلم ئے کنگ ءَ ات۔
گدانانی گندگ ءَ آئی ءِ چمّاں دو روک کپت ء ُ چہ شُد ءَ آئی ءِ چنگ تراتگیں لاپ ءِ ہورکیں روتانی کُر کُر گُشئے گیشتر بیت انت۔ پیشی مردماں راست گشتگ کہ ”شُدیگ ءَ پہ کاسگ ءَ سبر نہ بیت“۔ آ اشتاپی چہ درپ ءَ پر گوست،گاماں پہ بے تاہیری گدانانی نیمگ ءَ شہاردیان بیت۔وہدے آ چہ کور ءَ گدانانی سند ءِ ہوکین ءَ سرکپان ات نر گیانچے کہ سند ءِ سر ءَ نشتگ ات ء ُ چمّ ئے مرد ءَ سک ات انت، اناگہ چہ سند ءِ سر ءَ بال ئے کُت ء ُ آئی ءِ دیمیگ ءَ مانتر ات۔ مرد ءَ گوں نہ وشی آئی ءِ نیمگ ءَ چارات ء ُ لا ھول ئے ونت ء ُ دیمتر ءَ سرکپان بیت۔ آ کہ ھوکین ءَ سر کپت تہ جنیں آدم ہما برّیں تریشتر ءَ کہ بینگ شیپ ءِ لاپ ءَ سردیان ات بُلم کنگ ءَ ات۔ آ وہدے جنین ءِ نزیک ءَ رست، پرآئی ءِ دلگوش ءِ ترّینگ ءَ شہکارگے جت ء ُ شُت گدانانی دیم ءَ سرسلونڈکی نشت۔ چہ پسانی تند گور ءَ جنین آدم پاد اتکگ ات ء ُ پہ نرم رواجی آئی ءِ نیمگ ءَ پیداک ات۔ پُریں پنچ سالاں پد اے کوہ ء ُ گراں چیر بیگ ءَ مرچی آ جنین آدمے چو نزیک ء ُ دیم پہ دیمی ءَ گندگ ءَ ات۔ آ یک شر سورت ء ُ کسان سالیں جنینے ات، آئی چمّ جنین ءِ گامگیجاں سک ات انت۔ آئی ءِ اندری مارشت ء ُ چو برپ ءَ بداتگیں پگرانی تہہ ءَ گُشئے پاہارے چست بیان ات۔بلے شُد چہ ہر چیز ءَ زوراک تر انت پمیشکہ شُد ءَ آ گیشتر وار ندات کہ دگہ پگر ء ُ ھیالے بکنت۔ جنین آدم اتک ءَ نشت ء ُ آئی ءَ را تیار ء ُ جوڑی ئے کت۔
” واجہ! تو چہ کُج ءَ کائے؟“ جنین ءَ پُرس ات۔
”من شکاری آں ھور ءَ گپتگ ات شمئے گدان دیست انت تہ ہمے نیمگ ءَ اتکاں۔۔۔۔۔“
مرد ءَ پہ دروگ وت ءَ شکاری ے پدر کُت۔جنین ءَ آ برت ء ُ نوکتریں گدان ءَ نادینت۔آپ ء ُ تام ئے کُت ء ُ ہمود ءَ نشت ء ُ پہ وش روئی گوں آئی ء َ گپ ء ُ ھبر ئے کُت۔
دمانےء َ پد آ پاد اتک ء ُ پہ مہمان ءَ ورگ شر کنگ ءَ دومی گدان ءَ شُت۔مرد ءَ گدان ءِ چپ ء ُ چاگرد ءَ چمّ شانک دیان چاران کُت۔گدان ءِ
توک ءَ سچکانی تگردے پچ ات،کبلہ ئی سِریگ ءَ تہتے جتگ ات،گندلانی سر ءَ سنجرانی ٹپّرے ایر ات۔تہت ءِ پادیناں ھینزکے درتکگ اتء ُ ھینزک ءِ گور ءَ نوکیں دیزے ہم ایر ات۔چاران چاران آئی ءِ چمّ گدان ءَ مانجتگیں آسکی کانٹے ءَ کپت انت۔
دمانے ءَ پد جنین ءَ کنور ھلاس کُت ء ُ اتک تاں آئی ءِ چمّ مرد ءِ چپیں دست ءِ ھوناں کپت انت آئی ءَ گوں ھیران ء ُ پدردیں گالوارے ءَ جست کُت۔
” تئی دست ءَ چون بیت؟“
”من اے کانٹ زرت کہ سواس ءِ بند ءَ نوک کناں بلے شوم ء ُ شانزدہ کانٹ منی دست ءَ مان اتک“۔ مرد ء َ پسّہ دات۔
جنین ءَ اشتاپی ءَ لہتیں بلوچی درمان آورت ء ُ آئی ءِ دست ءِ ٹپ درمان کُت۔جنین ءِ نرم ء ُ نازرکیں دستانی گرمی گُشئے آئی ءِ رگ ء ُ بندانی تہہ ءَ ایر کپان ات۔ٹپ ءِ درد بیگواہ ات ء ُ آیک اجبیں وشی ے مارگ ءَ ات۔
جنین ء َ دست درمان کُت ء ُ شُت پرزونگ آورت ء ُ پچ کُت، ورگ آورت ء ُ مرد ءِ دیم ءَ دات انت۔مزنیں مدتے ءَ کوگ کپتگیں ناہ یاکوہانی کونرانی شورگ ء ُ ورگ ءَ پد مرچی آ جنین آدمے ءِ دستانی اڑ کتگیں ورگاں ورگ ءَ ات۔آئی ءِ دپ ءَ اے ورگ انچو وش ء ُ تامدار ات انت گشئے آئی ءَ گوستگیں پنچیں سالاں ورگ ءِ تام نہ چشتگ ات۔وہدے ورگ ھلاسی ءَ رست انت ء ُ آئی ءَ شر سیر کُت نی آئی ءَ سر چست کُت ء ُ جنین ءِ نیمگ ءَ چار ات ء ُ جست کُت:
”شمے مردین آدم کُجا انت۔۔۔۔“
”مردین منی مرد ء ُ یک براتے،بلے آ دیریں بندے ءَ مئے لہتیں مال انت ہمایانی آرگ ءَ شُتگ انت“۔جنین ءَ گوں بچکندگے پسّہ دات۔
”تر ءَ گڑا تہنائی ءَ اے کوہانی تہہ ءَ نہ تُرسیت۔۔۔۔۔؟“ مردین ءَ پہ ھیرانی جُست کُت۔
”چی ءِ تُرس۔۔۔۔۔ما چہ کسانی ءَ ہمے کوہانی تہہ ءَ رُستگ ء ُ مزن بیتگیں۔۔۔۔۔۔“ جنین ءَ کندگے جت ء ُ گشت۔
ہمے رنگ ءَ تاں دیر ءَ جنین ءَ گوں وتی مہمان ءَ پُرکندگے روے گپ جت ء ُ مردکہ ہم دپ ء ُ دہ کندگ ات۔
لُنجیں شپ ءَ تہاریانی سیاہیں چادر شری ءَ مانپوشتگ ات،پوراں ہم وتی پند ءِ تکے بُرّتگ ات، سُہیل دیم ءِ رو ءَ چو گروناکی درپشگ ءَ ات،
چرتّانی توار ءَ شپ سر ءَ زرتگ ات۔بید ہیں کوہانی تہہ ءَ آ گوں یک مہروانیں ء ُ زیبائیں جنین آدمے ءَ گوں تہنا ہم دیوان ات۔آئی ءِ دل ءِ گیمُرتگیں واھش چو نوک تجیں کشار ءَ تُرکان ات انت۔تاں دیر ءَ گپ ء ُ رپ ءَ پد جنین ءَ گہاسگے جت ء ُ پاد اتک تہت ءِ سر ءِ گندل ئے پچ کُت انتء ُ گوں پُر مہریں بچکندے ءَ گُشت ئے:
” شپ نی بے وہد انت، اے تئی جاہ اِنت ء ُ تو آرام کن۔“
جنین چہ گدان ءَ در کپت مرد وتی جاہ ءَ دراج کش بیت بلے واب گشئے زانا آئی ءِ چمّانی ایر گوات ءَ نہ گوستگ ات۔
جنین ءِ پچیں رو، بے مڑاہیء ُ کاگدیں لُنٹانی بچکند یک شل ءَ آئی ءِ چمّانی دیم ءَ روگ ء ُ آیگ ءَ ات انت۔آ پہ بے چاڑی اے کش ء ُ
ا ٓ کش ءَ لیٹگ ءَ ات۔ اناگہ چہ مامانگ ء ُ دو دلیں ھیالاتاں پچ گُڑات۔۔۔۔۔پاد اتک ء ُ پاداں گران جنین ءِ گدان ءِ نیمگ ءَ شُت۔ نرم نرم ءَ گدان ءَ پُترت۔ گدان ءَ مر مراکیں آسے روک ات ء ُ جنین یک کہنیں نپادے ءِ سر ءَ وپتگ ات۔آ جنین ءِ سرین ءَ شُت ء ُ سرئے جہل کُت کہ پرآئی ءَ امبیر بہ بیت بلے جنین کہ واب ء ُ آگہ ات اناگہ چمّ ئے پچ کت انت ء ُ یک ترندیں شہماتے آئی ءِ ھاجگوراں ھتر ئے کش ات۔ بے گت ء ُ گمانیں شہمات ءِ ترندی ءَ آئی ءِ گوشاں گُشئے چو وش تواریں کروسے ءَ بانگ دات، آ وتی جاہ ءَ سنگء سیاہ بوت۔ جنین ءَ دست ء راست ءَ ایریں ٹالبُریں تپر دست ءَ کُت ء ُ چَک پہ مرد ءَ ترّینت۔
” اگاں من بلوٹتیں شہمات ءِ بدل ءَ گوں اے ٹالبُرّ ءَ تئی سر گزل گزل کت کتگ ات بلے تو منی مہمان ئے پمیشکہ اے رندی تر ءَ بکش اتگ بلے اگاں تئی چمّاں تُشے ہم آپ است تہ اے شہمات تر ءَ بائد چہ تپنگءِ تیرے ءَ گیش بہ تورین ایت۔“ جنین ءَ تپر ءِ دستگ ڈگار ءَ سک دات ء ُ پد ءَ دلگوش ئے گوں مرد ءَ کُت۔
” بہ گُش!! ترءَ چہ منی کجام گپ ءَ بدی ءِ شُبینگ بیتگ؟؟ پہ ہمے ھبر ءَ کہ تر ءَ اِزت داتگ، تر ءَ بلوچی رو ء ُ دم داتگ،گوں تر ءَ چو وتی برات ءِ گونگ ء ءَ وش روئی گپ ء ُ ھبر کتگ۔۔۔۔دریگتیں چہ جنینے ءَ ابید تو من ءَ یک مونس ء ُ درد واریں بلوچے ہم بہ لیک اتیں۔“جنین ءَ پہ بژن وتی لُنٹ گٹ چت انت ء ُ گوں پدرد ء ُ پرشتگیں گالوارے ءَ گُشت۔۔۔۔دمانے بے تواری ءَ پد آئی ءَ پد ءَ سر چست کُت ء ُ گوں مرد ءَ بیزار بیزار ءَ گُشت۔
”برو۔۔۔۔۔بیرہ کن ء ُ چو شہمیں مردمے ءَ وتی جاہ ءَ بہ وپس۔“ مرد ءَ ترکگ ہم نہ کُت، پُشت ئے پِر کُت ء ُ دومی گدان ءَ رہادگ بیت۔ بلے آئی ءِ لُنٹ لرزان ات انت ء ُ گوں وت جیڑگ ءَ ات۔
”من۔۔۔۔من۔۔۔من وتی دست ء ُ دیم۔۔۔۔۔۔۔“ بام ءَ داتگ ات۔ درچکانی سر ءِ مُرگاں ہم چِری چِری ے پِرات، سمین کاہء ُ بوچ ء ُ داراں نرم نرم ءَ گور موش دیان گدان ءِ تہہ ءِ درنگ ءَ شیک دیگ ءَ ات۔مرد مہلہ پاد اتکگ ات ء ُ وتی سواساں پاد ءَ مان لگوشگ ءَ ات، ہمینچُک ءَ جنین آدم گدان ءَ پُترت ء ُ گوں بچکندے ارز بندئے پہ مرد ء َ شہاورت انت۔جنین ءِ رو چہ دوشیگیں ھبر ءَ تُشے ہم تہار نہ ات۔مرد ءَ ارز بند پہ کمشی دست گپت انت، بلے آئی ءِ دل چہ ورگ ءَ پہک شُتگ ات، ارز بندئے زرت چادر ءِ لمب ءَ بست، تپنگ ئے بڈ ءَ کُت ء ُ چہ گدان ءَ در کپت۔ جنین ءَ توار پِر جت ء ُ گُشت۔
” براتُک۔۔۔۔براتُک کموکے بجل۔“
مرد ءَ چک جت ء ُ اوشتات، جنین ءَ کہ آبریشمی دزمالے دست ءَ ات مرد ءِ دیم ءِ رو ءَ اتک ء ُ ہمے دزمال ئے پہ مرد ء َ شہاورت ء ُ گُشت ئے۔
” بزیر۔۔۔۔۔۔اے دزمال ءَ وتی سر ء ُ گوشاں پتا۔۔۔۔۔گوات سارت انت۔“مرد کہ سرئے جہل ات، زوکّگ ئے ہم نہ کُت،لوٹ اتئے کہ سر ءَ چست بکناں ء ُ جنین ءِ نیمگ ءَ بچاراں بلے چمّاں آئی ءِ ہمراداری نہ کت، آئی ءَ دست شہاورت دزمال دست گپت بلے چہ آئی ءِ چمّاں دو زنڈیں ترمپ ارس شتور گپت، چہ جنین ءَ وتی ارسانی چیر دیگ ءَ آئی ءَ اشتاپی ءَ وتی دیم ترینت ء ُ وتی ارس ئے پہک کُت انت۔جنین ءَ مرت کہ آ چہ دوشیگیں ھبر ءَ سک پشومان انت پمیشکہ آئی ءَ دل ھڈی دات۔
”ردی گوں ہر کس ءَ بیت، بلے من تر ءَ پہل کُتگ۔“
” بلے من وت ءَ۔۔۔۔۔۔من کہ ہما اولاکاں کہ وتی دلسریں سوار من ماں تہہ آپیں گراں شگالیگ کُتگ انت۔“ مرد ءَ گوں پُرشتگ ء ُ بژنیں گالوارے ءَ گُشت۔
جنین ءَ گوں ھیرانی ءَ جست کُت،
” من پوہ نہ بیتاں تو چے گشگ لوٹ ئے۔۔۔۔۔؟“
آئی ءَ پُر تکشگیں چمّے جنین ءِ نیمگ ءَ چارات ء ُ درائینت۔
” تو منی چمّ پچ کُت انت، تو تچکیں ھبر شون دات من ءَ منی گوہار۔۔۔۔! من وت ءَ را مزنیں گیرت دارے لیک اتگ ہمے کوریں گیرت ءِ مست ء ُ گُمراہیں کُمار ءَ بے جست ء ُ پُرس ءَ من وتی دُتکیں گوہار شدری ء ُ وتی کساں سالیں لوگ بانُک ملک ناز ءِ برات بے بزگی مپت ء ُ نا ھک ءَ کُشت انت۔ بلے منی کوریں گیرت ءِ پاشک دوشی گوں تو پاد اتک، نی من ءَ سما کپتگ کہ من وتی زند ءِ مستریں رد وارتگ۔گوں وتی ہمے کوریں گیرت ءِ رند گیری ءَ دست ء وت وت ءَ چہ زند ءِ شادہاں زبہر کتگ۔۔۔۔میاریگاں۔۔۔۔۔من میاریگاں منی گوہار!۔۔۔۔۔۔ شدری ءِ ھون ء ُ ھون ریچیں جون منی چمّانی دیم ءَ انگہ پلپٹگ ء َ انت۔۔۔۔منی گنوکی ءَ منی دُتکیں شدری چہ من سست۔۔۔آ چو تئی داب ءَ بے مڑاہ ء ُ دپ ئے دائم پُرء کندگ ات۔بلے افسوس کہ منی ناسرپدی ءَ آ چہ من مجتی پُل اِتء ُ منی زند ءِ مراد، منی دوستیں لوگ بانُک ملک ناز ءِ لک ء ُ بیرکیں برات واجُل ہم منی کُنٹ گندی ءِ دیناں شُت۔اشکنگ ءَ آ مرچاں وتی پت ءِ لوگ ءَ انت ء ُ آیانی مردم چو تازی ء َ منی پد ء ُ رند اں بو گران انت ء ُ من چہ پُریں پنچ سالاں باروٹیاں، بلے۔۔۔۔۔۔۔بلے نی من زندگاں
چیا۔۔۔۔۔؟ منی گوہار! من میاریگاں۔۔۔۔۔ھو سر ء ُ گوشاں میاریگاں۔“ آ لبجان ءَ ہما راہ ءَ کہ اتکگ ات ہما راہ ءَ راہ گپت۔
سہ ماہ ءَ پد یک روچے اناگہ جنین ءِ سر ہما کوہانی دمباں کپت تہ آ ھیران ء ُ ھبکّہ بیت، پرچہ کہ کوہنیں دمبانی ھوردگیں سنگانی تہہ ءَ نوکیں دمبے رُستگ ات ء ُ گُرکی ئیں تپنگے گورے ءَ توک ءَ توک دو جاہ ءَ پُرشتگ ء ُ کپتگ ات،ہمے نوکیں دمب ءِ سرین ءَ مکّیں دارے ءِ سر ءَ آبریشمی دزمالے چو بیرک ءَ گوات ءَ گون ات

What do you think?

Written by مستعار

Leave a Reply

Your email address will not be published. Required fields are marked *

GIPHY App Key not set. Please check settings

بلوچی آزمانک

( آزمانک,, نُنکّ،، ناگمان)

لبزانکی چیدگ ءُ بھرگ؟

لبزانکی چیدگ ءُ بھرگ؟