in ,

“آزمانک” چُنکی ،، ناگمان “

"آزمانک" ماہ پرچہ ڈولدار انت؟ " ناگمان"
"آزمانک" ماہ پرچہ ڈولدار انت؟ " ناگمان"

آ کماش چہ ڈگار ءَ سے لَچ ماش ءِ رُنگ ءُ کوسگانی سرچنگ ءَ رند ،ڈگرّیں کھیر ءِ چیر ءَ دم کنگ ءَ تچک ات-گرماگی روچاں ھروھد ءَ کہ آئی ءَ چہ کار ءَ دم بُرت-پہ دم کنگ ءَ ھمے پیریں کھیر ءِ چیر ءَ اتک ءُ سارت ءُ بزیں ساھگ ءَ تچک بوت-اے نی آئی ءِ عادت جوڑ بیتگ ات-چو ڈگرّیں کھیر ءِ جند ءِ روتگانی وڑ ءَ اے عادت ءِ روتگ انچو جھل شُتگ اتنت کہ کماش ءَ دگہ ھچ کھیر ءِ چیر ءَ نندگ ءُ وپسگ وشّ نہ بوت آئی ءِ ھمسروئیں کماشاں آرا برے برے کلاگ زُرت کہ اے کھیر یکروچے کپ ایت ءُ تئی جند ءَ چیر ترّینیت-بلے آئی ءِ پسّہ مدام ھمیش ات-کوھنیں ھمراہانی یلہ کنگ گران انت،،
آئی ءِ دل پہ واب ءَ روگی ات کہ بے تواریں چاگرد ءَ پادبرمشے گوشان ئےِ کپت-چَکّ ئےِ جت ءُ چارت ئےِ-آئی ءِ چُکّانی مات ءَ سُبارگ گون ات ءُ پیداک ات-ھُردکیں رگتے ھم گون ات آ گوں وتی نماسگ ءِ گندگ ءَ گل بوت-آئی ءِ نشار مرچی وتی مات ءُ پت ءِ گندگ ءَ کور ءَ آ دست بازار ءَ شُتگ ات-نوک شیر ءَ پچ کتگیں نیوگے برتگ ات گوں-بلے رگت ھمدا ات “بَچکّ! تو مات ءَ نہ شُتگ ئے گوں ؟آئی ءَ چہ نماسگ ءَ جُست کت-بلے چرائی ءَ پیش زال ءَ پسّہ دات” شیرین ءَ وَ گْوشت بریں بلے ایشی ءَ گُشت اگن پیربا کیت گوں ،من کایاں گوں،،
کماش ءَ ٹھک دیان ءَ نماسگ بڈّ ءَ کت ءُ پیشانیگ چُکّ ات چرے گپّ ءَ کماش گل بوت کہ آئی ءِ نماسگ آرا چہ وتی مات ءَ ھم گیشتر دوست دار ایت-
ھمے سھت ءَ نزیک ءَ کھیر ءِ سرا نشتگیں کپوتے کوکو ءَ لگّ اِت-گونڈو ءِ دلگوش ھمانگُر شت-
“پیربا! من ءَ کپوتے بد ئے ،،
” کپوتے؟ چون ئےِ کن ئے ؟،،
“کپوت ءِ کوکو ءَ وش انت من لوگ ءَ بران ئےِ گوں- بِلّے ھمودا کوکو کنت،،
بلے منی وَ…….
” آ انت یکے ءِ توار انت،،
“انّی گرگ نہ بنت ابّا من رندتر ءَ دام ءِ سرا پہ تو یکے گراں کاراں گوں-انّی من دَمبُرتگ شرّیں؟،، ساکمیں نماسگ ءَ اڑی نہ کت-البت گوش ئےِ انگت کپوت ءِ کوکوان ات انت-
نماسگ ءِ گپاں کماش وتی یکیں بچ ءِ ترانگ ءَ پرّینت-کہ انّی ولایتاں کار ءَ ات آئی ءَ ھم ھُردے ءَ کپوت ءِ کوکو دوست اتنت رگت نہ تھنا رنگ ءُ دانگ ءَ پت ءِ داریں سر ات-بلکیں گپّ ءُ ھیال ئےِ ھم ھمائیگ اتنت بچ ءَ دوسال ءُ شش ماہ توام ات کہ چدا شُتگ ات-آ وھدی رگت نوکی شیرین ءَ چہ شیر ءَ پچ کتگ ات ءُ نیوگے لاپ ءَ ات-
“ھو! دیر ئےِ کت! ،،کماش ءِ دپ ءَ درآتک پیرزال کہ باریں چہ ھیالان ات-ھیراں بوت ءُ وتی مرد ءِ نیمگ ءَ روک روک ءَ چارگ ءَ لگّ اِت-
” کئے دیر کت من… ؟،،
“ناں ناں-تو ناں رگت جان ءِ پت ءَ – ،،
کماش ءَ گُشت ءُ پیرزال ءِ دیم ءَ ھم ابیتکی یے منشات-دوھیناں پہ دوستی وتی نماسگ ءِ نیمگ ءَ چارت کہ گوں کپوت ءِ کوکواں دلگوش ات-کماش ءَ گوں گرّگرّیں توارے ءَ کوکار کت “کوکوکو… کوکوکو ،، ءُ نماسگ ءُ زال آئی ءِ سرا کندگ ءَ لگّ اِت انت-
روزرد ءَ وھدیکہ کماش ءَ لچے کاہ بڈّ ءَ ات ءُ دیم پہ لوگ ءَ روان ات-تہ کلوری چُنکی یے ھم گون ات ئےِ-دام ءَ ھچ نہ گپتگ ات- البت ڈگرّیں کھیر ءِ چیر ءَ ھمے چنکی زکرتگ ات کہ چہ کُدو ءَ کپتگ ات-گوں ھُشکیں دستاں روگ ءِ بدل ءَ آئی ءَ ھمے چُنکی زُرت گوں-دانکہ دوستانکیں نماسگ ءِ دل مہ پُرشیت-آ دنیگہ چہ لوگ ءَ گپڑّے راہ ءَ ات کہ رگت ئےِ دیست کہ چہ گل ءُ اُمیت ءَ کندان ءَ کرشیتان ءُ تچان ءُ سِٹّاں ءُ ھمنگر ءُ پیداک ات-
“پیربا! اے چِپلُکے! ،،رگت ءَ چنکی دزگران ءَ پہ گل ءُ ھیرانی گُشت-
” ھو! منی پت! اے تئی وڑین ئے،،کماش ءَ بچکند ات-
“ات کوکو کنت؟،،
” اناّں دنیگہ کسان انت،،
“تو نہ گشت کہ تئی وڑین ئے؟ من باریں گپّ زاناں اے چتو کوکو نزانت؟،،
” ترا پنچ سال انت ایشی ءَ بلکیں پنچ روچ نہ بیت،،
ھُردکیں رگت ءِ سَرپِر نہ بوت کہ وھدے آئی ءِ عمر پنچ سال ءُ کپوت ءِ چُنکی ءِ پنچ روچ انت گڑا آ ءُ چنکی چوں یک وڑین اَنت-بلے آئی ءَ اے جنجال ءِ سرا زیادہ ھیال نہ کت ءُ گوں پیرُک ءَ درّائینت ئےِ :
” پیربا! من ایشی ءَ کوکو گوشاں گوں،،
بگُش کوکوکو… کوکوکو رگت ءَ چُنکی وتی دپ ءِ نزیک ءَ آؤرت ءُ کپوت ءِ وڑ ءَ کوکو ءَ لگّ اِت تُپّ نام ھُدا، تُپّ ماشاءاللہ،، کماش ءَ وتی نماسگ تُک کت-آئی ءِ نزر گردک اتنت- یکرندے ڈگار ننگار کنگ ءِ وھد ءَ آئی ءَ ننگار ءِ ستا ءَ ایوک ءَ یک دانکے چہ دپ ءَ کشّتگ ات کہ “ننگارے نہ انت گُشئے زھمے وَ ،،
ھما دمان ءَ ننگار ءَ گوں سنگے ءَ ڈیک وارت ءُ کمیر ئےِ پرشت – ،،آئی ءَ نماسگ ءَ را پدا تٌک جت-
مگرب تھار ءَ باریں چہ کجانگُر جمبراں سر کش ات ءُ زیتاں آزمان اش پُچت-آہاں شام کتگ ات ءُ نشتگ اتنت کہ ترمپاں ایردات-
” شربوت من ماش ھلّینت انت-اگن ناں ھور ءَ کار بروبر کتنت-،،کماش ءَ گوں زال ءَ گُشت-آئی ءِ کُٹ ءَ نشتگیں نماسگ ءَ گشئے گپے ترانگ کت-
” پیربا! اماّں ھور ءِ سرا انت ؟،،
“اناّں ڈئے-آوتی پت ءُ مات ءِ لوگ ءَ انت-،،
” امّاں ءَ بگش ڈنّ ءَ درمیا-ھور ءَ میسّ ئے شرّیں ؟،،
کماش ءَ چمّ نزّ کتنت ءُ انچو گپّ ءَ لگّ ات گشئے نشار آئی ءِ توار ءَ اشکنگ ءَ انت-اے وھدی گشئے آ ھم زھگے ات-
” شیرین! رگت گشیت ڈنّ ءَ درمیا میس ئے!،،
” بگش نیوگ ءَ ھم ڈنّ ءَ مہ بر! ،،
” گشیت نیوگ ءَ ھم ڈنّ ءَ مہ بر ،،
رگت ءَ چم لوگ ءِ دیم ءَ دِرتکگیں چُنکی ءِ ڈبّ ءَ شت انت-
” پیربا! چنکی ءِ امّاں کجا انت؟،،
“ڈگرّیں کھیر ءِ کُدو ءَ ،،
” ایشی ءَ پیربا ءُ پیرما ھست ؟،،
” ھو!
آہاں ھم بگش کہ چہ کدو ءَ درمیا ات-ھور انت- کماش ءَ اے کلوہ ھم سرکت-گونڈیں رگت بے توار ءَ تھت ءِ سرا پیربا ءِ کش ءَ وپت ءُ ڈب ءِ نیمگ ءَ چارگ ءَ لگّ اِت-ڈن ءَ ھور تُرند بیان ات-آ گُشئے چُرتے ءَ کپت-
“پیربا! ،، آئی ءَ اناگت ءَ گُشت-
“ھاں! ،،
” نی من زاناں کہ اے پرچا کوکو نہ کنت،،
” ھو؟ پرچا…. ؟
“آئی ءَ ادا وش نہ بیت-باندا پدا بر ئےِ گوں،،
” پدا…..؟
“ھو! آہاں بگش من نہ جتگ-آپ ءُ دان داتگ لیب کتگ گوں-شریں پیربا… ؟،،
شریں بابل!،، کماش ءَ وتی نماسگ گُلائیش کت ءُ سر ءِ پُٹان ئےِ سمارگ ءَ لگّ اِت-آئی ءِ چمّ کپوت ءِ چُنکی ءِ نیمگ ءَ شت انت- کہ ڈب ءِ تھا زکرّتگ ات-کماش ءَ اناگہ ءَ انچو سما بوت گُشئے آئی ءِ دست رگت ءَ ناں بلکیں کپوت ءِ چُنکی ءَ سمارگ ءَ انت-
چراگ بلوچی 1996

What do you think?

Written by مستعار

Leave a Reply

Your email address will not be published. Required fields are marked *

GIPHY App Key not set. Please check settings

نبشتہ کار: رُکسار بلوچ ءُ بانڑی بلوچ

“آزمانک” ماہ پرچا ڈؤلدار انت؟ ” ناگمان”

بلوچی آزمانک

( آزمانک,, نُنکّ،، ناگمان)