یکّیں درچک ءِ بَر ءُ بورّیں سر ءُ شاہ ایں من ءُ تو

یکّیں درچک ءِ بَر ءُ بورّیں سر ءُ شاہ ایں من ءُ تو

یک ءُ دومیـگ ءَ بلے دیـر ءُ جتائیں من ءُ تـو

پُشک ءُ پونانی بدل کِشمش ءُ بادام نہ بنت

جور ءِ باپار کُتگ ھیر نہ جائیں من ءُ تو

من ءُ تو وھد روان اِنت کَش ءُ کِرّ ءَ گون ایں

کئے بہ زانت وھد کُجا اِنت ءُ کجائیں من ءُ تو

بیا دوئیں سنگ بہ تراش ایں چو براھیم ءِ بُت ءَ

وت وتی جند ءِ تھا ھُدائیں من ءُ تو

زاھر ءَ بِلّے مزارانی وڑ ءَ جاک جَن ایں

چو مہ بیت ماں دل ءَ شُرد ءُ بگائیں من ءُ تو

ناں گجر تُرک نہ تازی نہ پرنگ ءُ ھندی

کسی ھمراہ نہ ایں جند ءِ وڑ ءَ ایں من ءُ تو

بارگیں ساد ءِ وڑ ءَ کازی منی ساہ سِد اِیت

چی اِنت بستار منی تئی چہ بلاھیں من ءُ تو

مبارک کازی