فریبا بورھنزهی ایران ءَ تروریست ءِ پیداک کنگ ءِ ھاترا اعدام ءِ گیش کنگ ءِ ھشدار ءَ دنت
بلوچ رسانکدر ءِ رد ءَ پنچ شمبے 1 اپریل ءَ بلوچستان ءِ راجی پارٹی ءِ باسک ءُ انسانی ھکانی جھدکار فریبا بورھنزھی ءَ گوں توار آف امریکہ ءَ گپ ءُ تران کنان ءَ گْوشتگ کہ اسلامی جمھوریت ایران مدام چہ بلوچستان ءُ دمگاں ، ھاسیں رنگ ءَ کردستان ءُ دمگاں اعدام ءِ رھبند ءَ کارمرز کنت ۔ ملکی ءُ درملکی دباؤ ءِ گیش بوھگ ءِ وھد ءَ چاگرد ءَ را دیم ءَ برگ ءَ انت۔
آئی ءَ انوگیں اعدامانی ھال ءَ گیش کرتگ کہ بازیں اعدام بوتگیں مردمانی سیادی گوں جنوری ءِ زھرشانی ءَ اِنت ءُ سرکار گوں اے گامگیجاں ایران ءِ مرکز ءُ کش ءُ گور ءِ دوئیں دمگاں ترس ءُ بیم ءِ چاگرد جوڑ کنگ ءِ جھد ءَ اِنت دانکہ آئی ءِ زندگ بوھگ برجاہ بہ بیت۔
بورھانزھی ءَ اے جُست ءِ پسو ءَ کہ اے اعدام مردماں چہ سرکار ءَ گیشتر دور نہ کن اَنت یا نہ، گْوشتگ: ھاں اے راست اِنت بلے اسلامی جمھوریت چو ڈوبوکیں مردمے ءَ اِنت کہ اے گامگیجاں وتی رکّینگ ءِ گڈی جھد لیک اِیت۔
انسانی حقانی جھدکار ءِ اے گپ ھما وھد ءَ شنگ بوتگ اَنت کہ گوستگیں روچاں اعدام ءِ گیش بوھگ ءَ را اسرائیل ءُ امریکہ ءِ گوں جنگ ءِ رد ءَ راج ءِ نا رضایتی ءِ کنٹرول کنگ ءِ ھاترا سرکار ءِ مستریں وسیلہ آنی تہ ءَ یکے لیکگ بوھگ ءَ اِنت؛ یک انچیں رھبندے کہ نگدکارانی رد ءَ اقتدار ءِ استحکام ءِ بدل ءَ سرکار ءُ چاگرد ءِ نیام ءَ فرق گیش بوتگ ءُ آئی ءِ ڈھانچہ ءِ نزور بوھگ ءِ نشانی زانگ بیت۔