ــــ نقل ءُ نقد ــــــ شے سید ــــ 14/4/2018 ــ

(نگدانک)

ــــ نقل ءُ نقد ــــــ شے سید ــــ 14/4/2018 ــ

بلوچی شعری لبزانک ءِ پڑ ءَ یک آشنائیں نامے ارشاد پرواز ئیگ اِنت ـ ارشاد مئے بلوچی شاعرانی سینئرانی لڑ ءُ لسٹ ءَ ھوار کنگ بیت ـ ما سن 2000 ءَ کہ لبزانک ءَ وتی گام ایر کت اَنت تہ ارشاد پرواز سک نامدار اَت ـ گلوکارانی دپ ءَ، دیوان ءُ مجلس آں، ارشاد پرواز ءِ نام جکسگ ءَ ات ـ کساس 2003 ءَ اگاں بے ھال نہ اوں، ارشاد ءِ اولی وانگی اتکگ اَت ” دراتکگ ماہ دمکاں ” دیمترا آئی ءِ دومی کتاب ھم چاپ بوت ” ساھگ دزگیراں ” ـ ارشاد پرواز ءِ پجّار ماں بلوچی شعری ادب ءَ چہ زانگ ءُ پجّارگ بیت ـ بزاں تھنا شاعری نبشتہ کنت ـ ارشاد ءِ بازیں شعرے مردماں پہ دل یاد انت ـ اے واستہ کہ گلوکارانی دپ ءَ بوتگ اَنت ءُ مردماں گوشداشتگ ءُ یاد کتگ اَنت ـ ارشاد ءَ وتی زمانگ ءَ شریں ءُ جوانیں شعر اوں پربستگ ـ درور اوں باز اِنت ــ بلے ـ

مرچی کہ سن 2018 اِنت، ما لوٹیں کہ ارشاد ءِ نوکیں ھیال ءَ چار ءُ تپّاس بکنیں کہ آیا آئی ءِ شاعری ءَ دیمروئی کتگ یا انا؟

مشھور زمانہ ء ادیب، چیک ریپبلک ءِ شھکاریں نبشتہ کار ” میلان کُنڈیرا ” ءِ اے کول سک نامدار اِنت ” کجام ھم نبشتہ کارے ءِ سرا انچیں وھدے بئیت کہ نبشتہ کنگ ءِ واستہ آئی ءِ گور ءَ ھچ پشت مہ کپ ایت ، گڑا ھاموش بہ بیت ءُ ھچ نبشتہ مکنت “( انٹرنیٹ) ـ

زی من ءَ تاکبند” گدار ” ءِ نمبر 10 کہ مارچ ءِ ماہ ءِ چاپ انت، دست کپتگ اَت ـ وانان وانان تہ درمیان ءَ اتکاں ءُ دیست کہ ارشاد پرواز ءِ دو شعر چاپ اَنت ـ بزاں ارشاد پرواز ءِ نوکتریں غزل اَنت ـ نوں اے دوئیں غزل copy اَنت ـ نقل اَنت ـ craftmansip یے، یا اثر پزیر اَنت ـ مئے اے نگدی نبشتانک ءِ سرھال ھمیش اِنت ـ نوں بیا اِت ارشاد پرواز ءِ شعراں چاریں ءُ گپ جنان کنیں ـ

تاکدیم 127ءَ ارشاد ءِ اے شعر چاپ اِنت: –

داں شراب ءِ کُمب نہ ھَلّیت ایں تئی دروازگ ءَ ـ

بندگ ءَ یک سھتے نئیل ایت تُنّگی دروازگ ءَ ــ “

ارشاد پرواز ـ

سن 2008 ءِ چاپ بوتگیں قاسم فراز ءِ شعراولی کتاب ” منی چندے دستونک ءُ لچہ ءِ تھا اے غزل ءَ بچار اِت: –

روچے مئے دمک ءَ کپان اِنت روچے تئ دروازگ ءَ ـ

ھرکجا چاریت نہ گِندیت زندگی دروازگ ءَ ــ “

قاسم فراز ـــ

وزن، ردیف ءُ کافیہ یکّ اَنت ـ قاسم ءَ سن 2008 ءَ دیما آورتگ ءُ ارشاد ءَ 2018 ءَ ـ دہ سال ءِ مزنیں gape یے است درمیان ءَ ـ

بازیں مردمے چو ھم گوشیت کہ اے لاشعوری کیفیت یے کہ دو شاعر ءِ ھیال دپ کپ اَنت ـ

کمو اے مسلہ ءِ سرا ھبر کنیں کہ سبب چی بوت کنت ـ بُرزا انچو کہ ما میلان کنڈیرا ءِ کولے زاھر کت، تہ مقصد ھمیش انت کہ اگاں یک شاعرے ءِ گورا دگہ نبشتہ کنگ ءَ ھچ چیزے پشت نہ کپتگ گڑا آ نبشتہ مکنت، ھچ آئی ءِ سرا زُور نہ اِنت ـ بوت کنت آئی ءِ تخلیقی صلاحیت ھلاس اِنت! بوت کنت دم یا rest کنگ ءِ توکا اِنت! اگاں نا ــ زَور ءِ کار ھمیش اِنت ـ

پیشاں ما اے اِش کتگ کہ جونیئیریں شاعرے چہ سینئیریں شاعرے ءَ متاثر بیت ءُ آئی ءِ شعرانی رندگیری ءَ کنت، آئی ءَ چہ اثر زوریت، بلے ما اِدءَ اے گِندگ ءَ اَیں کہ ارشاد پرواز چہ قاسم ءَ باز سینئیر اِنت، قاسم فراز ءَ سن 1998 ءَ ھمے دیم شاعری بندات کتگ ـ ءُ ارشاد ساری اِنت ـ محکم تریں ھبر ایش انت کہ قاسم ءِ اے شعر سن 2008 ءَ دیما اتکگ ءُ ارشاد ءِ شعر 2018 ءَ ـ دگہ مستریں سبوت چی مردم بلوٹ ایت ـ

گپ اِد ءَ اے بوت کہ ارشاد ءَ نقل کتگ ـ وزن ءُ ردیف ءُ کافیہ نقل کتگ اَنت ـ

اِے پُوائنٹ ءِ سرا بہ گِندے باز ءَ اے اعتراض بہ بیت کہ لبز ءُ ردیف ءُ کافیہ ءُ وزن کسی پت ءِ میراس نہ انت ـ

ما اے گپّ ءِ منّوکاں چہ نہ اَیں ـ ءُ مارا وتی اندر ءَ دلیل ھم گون ـ ما وتی دلیل آں پہ ساپ بیانی پیش ھم کنیں ـ گڑا کمو دلگوش!

ھر شاعرے چہ وتی گوستگیں شاعرانی شعراں اثر زوریت ـ آئی ءِ رند گیری ءَ کنت ـ پھتہ مجگ ایں شاعر ھمے داب ءَ کنان دانکہ وتی راھے گیشّین ایت ـ کامیاب بیت ـ بلے چیزے شاعر ھمے داب ءَ نقل ءُ کوپی کنان داں پشت اَنت ـ بزاں وسّرا گون بنت ـ اے فکر ءَ دار اَنت کہ اَرُو بَرُو من ھم گوں بہ باں، اے نچار اَنت کہ آئی ءِ نام انگہ است اِنت داں ھمنچک ءَ کہ نبشتگ یے،، نوں کہ نبشتہ کت نکنت، تہ نامے گِرگ نہ بیت ءُ ھمایانی نام گِرگ ءُ زکر کنگ بیت کہ نوکیں چیز نبشتہ کنگ ءَ اَنت، کافیہ ءُ ردیف آں نوکیں درشان ءُ دابے ءَ پیش کن اَنت کہ چدو ساری نبوتگ اَنت ـ

گڑا ھمے پشت کپتگیں شاعر لازم شعر نبشتہ کنت، ھالے ھمے وڑ چو ارشاد پرواز ئیگ ءَ بیت ــ

نوں اگاں ھمے اعتراض کہ شاعری کسی پت ءِ میراس نہ انت ما داں ھدّے ءَ گیشّینت ـ پدا ھم اگاں کسے سرپد نہ بوت گڑا ما انگہ ارزان تر بیاں کنیں!

اے بہ پھم کہ مسلہ نہ اِنت، سک باز شاعرانی ردیف ءُ کافیہ یک بوتگ اَنت ـ گڑا تقابل ءُ دیم پہ دیم کنگ ءِ واستہ شعرانی تخلیق چارگ ءُ تپّاسگ بوتگ اَنت ـ

بیا اِت گڑا ھمے کار ءَ ھم کنیں ءُ دوئیں شاعرانی غزلاں دیم پہ دیم کنین ءُ چاریں کہ کئی گور ءَ تخلیق ءِ power گیشتر اِنت ـ ھلانکہ اے گپ اوں گیش اِت کہ قاسم ءِشعر ساری انت چہ ارشاد ئیگ ءَ ـ

قاسم فراز گوشیت: –

روچے مئے دمک ءَ کپان اِنت روچے تئ دروازگ ءَ ـ

ھر کجا چاریت نہ گِندیت زندگی دروازگ ءَ ـ

نوں ارشاد گوشیت: –

داں شراب ءِ کُمب نہ ھلیت ایں تی دروازگ ءَ

بندگ ءَ یک سھتے نیل ایت تنگی دروازگ ءَ ـ

قاسم فراز ءِ اے جُتک ءِ تھا زندگی ءِ ھبر بوھگ ءَ اِنت ـ زندگی برے یک جاگھے ءَ کپان اِنت ـ برے مئے دمک ءَ کپتگ، برے تئ دروازگ ءِ دپ ءَ ـ ھرکجا چاریت بلے نہ گِندیت ـ دروازگ پہ علامت کارمرز کنگ بوتگ ـ بزاں راہ ـ زندگی ھرکجا بہ بیت ـ پہ وت راھے شوھاز بکنت، بلے قاسم ءِ گورا زندگی ءَ وتی راہ گار کتگ، کہ ھچ دروازگ ءُ راہ گِندگ ءَ نہ اِنت، زندگی کجام راہ ءَ سپر بکنت ـ پمشکہ برے یک جاگھے ءَ سرسر جنان اِنت ـ

دومی نیمگ ءَ ارشاد گوشیت کہ داں شراب ءِ کُمب نہ ھلیت ایں تی دروازگ ءَ ـ تنگی دروازگ ءَ وتی بندگ ءَ نئیل ایت ـ بزاں داں تُنّ است شراب ءِ ورگ ھلاس نہ انت ـ دگہ نا شعری استلاہ اے جُتک ءِ تھا گِندگ بیت ءُ نا دگہ پیگام رسانی یے ـ تھنا شراب ورگ ءِ زکر اِنت کہ من بیست ءُ چار گنٹہ ءَ نشہ ءِ ھالت ءَ بہ باں ـ

نوں اندازہ اے جنگ بوت کہ اے ھر دوئیں شعرانی تھا شعریت ءِ مزنیں پرکے است ـ قاسم ءِ گورا شعر ءِ بزانت سک پراہ ءُ شاھگان انت ءُ ارشاد ءِ گورا تھنا شراب ءِ نوشگ ءِ بے نپ ایں ھبرے، بزاں سکیں تنگ نظری یے ـ

دیمترا ارشاد گوشیت ـ

ھو شپ ءِ نیما مدام اُوشتاتگاں گوں بے وسی ـ

تو وتی دروازگ ءَ ءُ من وتی دروازگ ءَ ـ

اے جتک ءِ تھا اول گرامر ءُ زمان ءِ رَدی یے مان ـ نثر ءِ استلاہ ءُ زبان ءِ رِد ءَ اگاں بہ چار ئے گڑا ھَندی ءُ علاقہ یے گالوارے ءِ ھساب ءَ گوشگ بیت کہ ما ھردو اوشتاتگاں ـ گال جمع ءِ صیغا ءِ تھا پیداک اِنت ـ گڑا اے رِد چو بوتیں ـ

ھو شپ ءِ نیما مدام اوشتاتگ اَیں گوں بے وسی ـ تو وتی دروازگ ءَ ءُ من وتی دروازگ ءَ ـ

من اوشتاتگ آں ـ تو اوشتاتگ ئے، ما اوشتاتگ اَیں ـ آ اوشتاتگ ـ

شعری زبان ءُ بیان ءِ رِد ءَ اے جتگ اے وڑ بوتیں بزاں ” اوشتاتگ اَیں ” جمع ءِ صیغا چٹ رَد ارشاد ءَ کارمرز کتہ ـ

دومی اے جتک ءِ بزانت ءَ ھم دلگوش کنیں ـ

مدام شپ ءِنیما من تو اوشتاتگ ایں ـ پہ یک دومی ءِ دیدار ءَ ـ من ترا گِندگ لوٹاں ءُ تو منا ـ ما ھردو وتی وتی دروازگ ءِ دپ ءَ پہ بے وسی اوشتاتگ ایں ـ

زاھر ءَ دگہ ھچ وڑیں بزانت نہ دیگ ءَ اِنت کہ ما آئی ءَ سرجمیں شعرے گوشگ بکنیں ـ

بیا قاسم ءِ بند ءَ دلگوش ھم کنیں ـ

کئے ترا سھتے بہ گِندیت ءُ منا مانا بکنت ـ

واب دیوالاں نہ دیستگ، آگھی دروازگ ءَ ـ

اے جتک ءِ تھا ھیال، چھر، جمالیات، شدّت احساس یا محرومی، شعریت سک باز جوان ءُ تندُرست گِندگ ءَ کا اَنت ـ

دیوال مدام آگھ اَنت ءُ دروازگ آگھی نہ گِندیت ـ بزاں دروازگ واب اِنت ـ

اِے جُتک ءِ رِد ءَ دیوال ءُ دروازگ دو علامت اَنت ـ دیوال پہ ستر ءَ کارمرز بوتگ ءُ دروازگ پہ پردگ ـ

انسان ءِ لوگ ءِ ستر ءُ پردہ آئی ءِ دیوال ءُ دروازگ اَنت ـ اگاں اے دوئیں مہ بنت گڑا انسان بے ستر بیت، بے پردگ بیت ـ ہمشکہ زلوری اِنت کہ ھمک انسان وتی میتگ ءَ دیوال بکنت ـ

قاسم ءِ گورا ھمک گال ءِ بُنُکّی بزانت چہ وتی اسل بزانت ءَ جتا اِنت ـ

دیوال بائد اِنت پہ سلامتی مِک بہ بیت ـ بزاں آگہ بہ بیت ـ دیوال پُرشت ءُ پروش مہ بیت گڑا ڈنّی مردمے اندر ءِ ھالت ءَ دیست کنت ـ

دروازگ ھم آگھی نہ گِندیت، بزاں دروازگ مدام بند اِنت ـ واب، اِد ءَ بند بوھگ ءِ بزانت ءَ ھم دنت ـ اگاں دروازگ مُھر کنگ بہ بیت ءُ دیوال مضبوط کنگ بہ بیت تہ لوگ ءُ میتگ ءَ ارزشتے بیت ـ

ارشاد ءِ گورا گالانی بزانت ھما وڑا اَنت کہ بُنُکّی اَنت ـ بلے قاسم ءِ گورا انا ـ

دیمترا بچار ـ

ارشاد گوشیت ـ

کار لوٹیت جھد لوٹیت وھد لوٹیت بے ھساب ـ

پچ نکنت پہ ھرکس ءَ چو زندگی دروازگ ءَ ـ

سادہ بیانی ءِ رِد ءَ ارشاد اے گوشگ ءَ اِنت کہ زندگی پہ ھمک کس ءَ وتی دروازگ ءَ پچ نکنت ـ زندگی وتی راہ ءَ چو کس ءَ پیشندار ایت ـ دانکہ سک باز جھد مکن ئے، باز کار مکن ئے ءُ باز وھد مہ دے ـ

اے جتک ءِ تھا شعریت چی مان؟

اے گپ ءَ کساس مرچی انسان سرپد انت کہ زندگی ءِ تھا ھرھما انسان کہ شریں کار بکنت، باز جھد بکنت، ءُ پرے کارانی واستہ باز وھد بہ دنت گڑا آ کامیاب بیت ـ

اے گپ ءَ سرپدیں انسان زان اَنت ـ گڑا چی زلورت انت کہ ارشاد دوبارہ اے گپّاں تکرار بکنت، repeat بکنت ـ بار بار بگوشیت!

اے جتک ءِ تھا لس گپّاں چہ ابید دگہ شعریت ھچ مان نیست ـ

نوں قاسم ءِ بندے دلگوش ـ

مئیگ ءُ اے مُرگانی قاسم سنگتی سیادی ھمیش ـ

آ وتی جند ءَ شوھاز اَنت، من وتی دروازگ ءَ ـ

سیاد ءُ سنگت انسان ءَ چہ دومی ءَ نزیک کنگ ءِ جھد ءَ کن اَنت ـ مُرگ تھنا وتی جند ءَ شوھازگ ءَ اَنت ـ بلے انسان وتی دروازگ ءَ ـ بزاں انسان وتی راہ ءَ درگیجگ لوٹ ایت کہ زندگی ءَ کجام یا چِہ وڑ آسودگ بہ بیت ـ کجام راہ پرائی ءَ نپ دِہ اِنت ـ وتی جند ءِ شوھازگ یا وتی راہ ءُ کشگ ءِ!

اے جوانیں جستے ـ کہ آیا انسان کہ گُڈ ءُ مُنجیں دنیا ءِ تھا اتکگ، وتی جند ءَ بہ پول ایت یا وتی راہ ءَ؟

زندگی ءِ گوازینگ ءِ جوانیں کِشکے قاسم ءَ رستگ کہ اے دوئیں راھانی تھا انسان کجامی ءَ گچین کنت ـ

قاسم فراز ءِ سن 2008 ءِ وھداں پربستگیں اے شعر چہ ارشاد پرواز ءِ نوکیں شعرا باز توانا ءُ تندُرست تر اِنت ـ

ارشاد ءِ گورا تخلیق ءِ تاگت سک نزور اِنت کہ نقل ءُ کوپی یے کتگ آ ھم انچو پہ دیم ـ نقل ءِ توکا ھم ناکام اِنت ـ

بیا دیما روئیں ـ

ھمے یکّیں تاکبند ءِ تھا ارشاد پرواز ءِ دومی شعرا چاریں: –

چو مشین ءِ پیما بس کار چی بکنت مردم

زندگ بوھگ ءِ جنگ اِنت یار چی بکنت مردم ـ

منیر مومن ءِ اے شعر ءَ دلگوش کن اِت: –

پتّو بئیت پہ وت بہ جُنزیت یار مردم چی بکنت ـ

تی گَماں ماں پوش اِتہ بازار مردم چی بکنت ـ “

وزن دگرے بلے ردیف ءُ کافیہ یکّ اَنت ـ اے ھم نقلے، کوپی یے، یا دگہ لبزانکی استلاہ یے ءَ کارمرز بکن ئے گڑا توارُد ءُ سرقہ گوشگ بیت ـ

نوں اے جدید زمان ءَ منیر مومن ءِ تخیلی تاگت وتی ھیال ءِ بُرزی سطہ ءَ اُوشتاتگ ـ

منیر مومن گوشگ ءَ اِنت کہ مردم چی بکنت! پہ تو بئیت یا پہ وت بہ جنزیت ـ انسان وتی زندگی ءَ وتی واستہ بگوازین ایت یا تی واستہ! مردم چی بکت ـ

تی گَماں دراھیں بازار وتی انگیر ءَ ماں پوش اِتگ ـ نوں اے جاورھال ءِ تھا انسان مان گیش اِیت ـ نزانت چی بکنت ـ وتارا بشوھاز ایت یا ترا! چٹ ٹنشن ءِ تھا اِنت ـ

منیر مومن ءِ گورا ازم ءِ نازُرکی ھم بے کساس جوان اِنت ـ ءُ نوک نوکیں ھیال، شعر، جمالیات ءُ ایندگہ شعری لوازمات چٹ نوک ءُ پتّاکین اَنت ـ وھدیکہ ارشاد ءِ گورا ھم پہ نقل کنگ ءَ آ عقل موجود نبوتگ کہ پہ جوانی کارمرزے بکنت ـ

ارشاد ءِ شعر ءَ بچار ـ

چو مشین ءِ پیما بس کار چی بکنت مردم ـ

انسان چو مشین ءِ پیما شپ ءُ روچ کار بکنت ـ دگہ چی بکنت ـ کار اے واستہ بکنت کہ زندگ بہ بیت ـ کار نکنت لاپ وارت نکت، لاپ کہ وارت نکنت تہ زندگ نہ مان ایت ـ پمشکہ ارشاد گوشیت کہ مردم دگہ چی بکنت!

دیمترا ارشاد گوشیت: –

تو بگش تئی اشک ءَ پشت پما چے کپتگ ـ

تو بگش تئی مھر ءَ گار چی بکنت مردم ـ

منیر مومن گوشیت: –

ھر چڑکہ چو کہ زِیم ءَ رھسر ءَ واب انت اِدءَ

نوں تئی اشک ءَ مہ بیت شیوار مردم چی بکنت ـ

اے ھردوئیں بندانی بُنُکّی بزانت ھم یک اِنت ـ سرھال اشک ءُ مھبت اِنت ـ نوں فرق ءَ بچار ـ منیر مومن ءِ گورا ھرچیز نوک اِنت ـ ھیال ءُ چھرگ، ھاس درشان داب، چنچو نوکیں اندازے ءَ بیان کنگ بوتگ اَنت ـــــ

اے دوئیں شعر کہ ارشاد پرواز ئیگ اَنت، دوئیں نقل اَنت ـ

یکے منیر مومن ءِ شعرے ءُ دومی قاسم فراز ءِ ـ

بلوچی نوکیں شعری لبزانک ءِ تھا منیر مومن ءُ قاسم فراز ءِ وتی وتی جتائیں ءُ نوکیں تخیّل اَنت ـ نوکیں درشان داب اَنت ـ نوکیں تجربت آں گوں شعر پربندگ ءَ اَنت ءُ دیما پیداک اَنت ـ

بلے اے نیمگا ارشاد پرواز وڑیں مردم کہ مرچی سر ئِے پہ نقل ءَ درآورتگ، چٹ پشت کپتگیں شاعرے ـ ءُ اے نوکیں زمانگ ءَ کہ نوکیں نوکیں نام دیما پیداک اَنت، آوانی شعری توازُن ھم چَہ ارشاد پرواز ءِ اے دوئیں شعراں سک باز بَرز ءُ بُلند اَنت ـ

ما شر سرپدیں کہ مئے اے کسانیں نگدی نبشتانک ءِ وانگ ءَ گوں بازیں مردمے مئے سرا زھر گیپت ـ ھاس ارشاد پرواز ـ ھلانکہ مارا کس ایر جنگی نہ اِنت، ءُ نئیکہ کس بُرزا بَرگی اِنت ـ شعر وت گپ جَن اَنت ـ شما ھم اے فیصلہ ءَ کُت کن ئے کہ آیا نقل اَنت یا copy اَنت ـ

گڑ سرا ـــ

کجام ھم شاعرے کہ آئی ءِ زھن ءِ تھا شعر گوشگ ءِ مادہ ھُش اِتگ ءُ ھلاس اِنت، آ مطالعہ بکنت، دانکہ وتی شعری سپر ءَ دیمترا بُرت بکنت، اگاں اے کار ءَ کُت نکنت، الّم اوں نہ اِنت کہ پہ زُور شعر پر بہ بندیت ـ گڑا انجامے ھمے وڑ درکئیت ـ مئے بلوچی شاعرانی مستریں نزوری ھمیش اِنت ـ کہ بائد سیئیریں شاعرے بئیت ءُ وتی کستر ءُ جونئیریں شاعرے ءِ دلبڈّی ءَ بکنت دانکہ دیمترا شرتر نبشتہ بکنت، بلے مئے بلوچانی گورا معاملہ چَپّ اِنت ـ مئے مستریں شاعر وش نہ بنت کہ کستریں شاعرے دیما بئیت ـ بہ جائے کہ آئی ءِ دلبڈی ءَ بکنت، وتی کستریں شاعر ءَ دلپُروشی ءِ ھما سیمسر ءَ رسین اِیت کہ کستریں شاعر، شاعری ءَ پہ وت وبالے سرپد بیت ـ ھمے وڑا آ کستریں شاعر دلپروش کنگ بیت ـ کلاگ زورگ بیت دانکہ دیما مئیت ـ یا منا چی ھچ داب دیما مہ گوزیت ـ

بائد اِنت مئے مستریں شاعر وتی کستریناں وتی ھمراہ بکن اَنت، آیانی دست ءَ بگر اَنت ـ بلے مئے گورا اے وڑ نہ اِنت ـ کستریں شاعر وت مھنت کنت ءُ وتارا دیما کاریت، بلے پدا ھم مستریں شاعر آیانی دیما ڈنگر ءُ کُنٹگ ریچ اَنت دانکہ دیمترا شُت مکنت ـ بلے کس اے کُنٹگ ءَ ماں نیاریت ءُ ھرھال ءَ شاعر وتی راہ ءَ گیپت ءُ وتی شعری سپر ءَ برجاہ داریت ـ

بلوچی زبان زندگ بات ـــ