سرگْوست: دْروگ گوشیں مُلا

رمزان ءِ ماہ ءَ آدینگ ءِ روچ اَت۔ نیم روچ ءِ بانگ بوت گُڑا من پہ آدینگ ءِ نماز ءَ تیار بوت ءُ پہ نماز ءَ وھد ءِ سر ءَ وتی کارجاہ ءِ مسیت ءَ سربوت آں۔ چار رُکات سُنت ونت ءُ پد ءَ مُلا ءِ دیم ءَ پہ گُشتانک (ھُتبہ) ءِ دلگوش ءَ نشت آں۔
مُلا ءَ کُران مجید ءِ لھتیں تلاوت ونت پد ءَ رمزان ءِ ماہ ءُ روچگ ءِ سواب ءُ آیانی بستار ءِ بابت ءَ وتی گُشتانک بُنگیج کُتگ۔ مُلا ءَ یک کِسھے آؤرت ءُ گْوشت کہ رمزان ءِ ماہ اَت، یک ھِندوے ءِ زھگ بازار ءَ آپ ورگ ءَ اَت۔ وھدے کہ آئی ءِ پت ءَ وتی زھگ آپ ءِ ورگ ءَ چار اِت گُڑا ھما دمان ءَ وتی زھگ ءَ شھمات ئِے جت اَنت ءُ گْوشت ئِے “تو بدھت زاناں سرپد نہ ئے کہ مسلمانانی پاکیں ماہِ رمزان ءَ تو ماں بازار ءَ روچء نیمروچ ءَ آپ ورگ ءَ ئے”

ھندو وتی گِس آتک ءُ شپ ءَ دل اوشت ءَ مُرت۔ گُڑا ھمے نیکیں کار ءِ مُز ءَ ھندو ءَ بھشت ءَ جاہ دیگ بوتگ۔ وھدے کہ ماں بھشت ءَ ھندو ءِ ھمساھِگیں نیکیں مسلمانے ءَ ھندو دیست گُڑا ھبکّہ بوت ءُ جُست ئِے کُت “واجہ تو وَ ھندوے اِت ئے گُڑا تو چون بھشت ءَ آرگ بوت ئے؟”
ھندو ءَ پسّو دات “من پہ رمزان ءِ ماہ ءِ شرپ ءَ وتی زھگ ءَ شھماتے جت پمیشکا ھُدا ءَ من ءَ پہ ھمے مُز ءَ بھشت ءَ جاہ دات”

وھدے کہ من کسہ اشکُت گُڑا من سک ھبکّہ بوت آں۔ چوناھا مُلا منی پجّاروک اَت پمیشکا من ھمے دمان ءَ پہ جُستے ءَ دست جِست کُت۔ گُڑا من ءَ گْوشت ئِے کہ تئی ھر وڑیں سوالے بیت اد ءَ جُست مہ کن کہ نماز ءِ گْوشتانک بیگ ءَ اِنت ۔ وھدے کہ نماز آسر بیت پد ءَ چہ مسیت ءَ ڈنّ ءَ وتی جُست ءَ بہ کن۔ گُڑا من ھاموش بوت آں۔

گْوشتانک ءَ پد آدینگ ءِ نماز بوت۔ من نماز ونت ءُ پد ءَ ڈن ءَ مُلا ءِ ودار کُت۔ وھدے کہ مُلا ڈنّ ءَ آتک گُڑا دْروت ءُ درھبات ءَ پد من جُست کُت “واجہ منی جُست اے نہ اِنت کہ ھما بھشت ءَ جاہ رس اتگیں ھِندو ءِ نام کَے اَت؟ یا زاناں کُجام دمگ ءُ مُلک ئیگ اَت کہ بھشت ءَ جاہ ئِے رس اتگ؟ بلکیں من ھیران آں ءُ منی جُست تھنا ایش اِنت کہ دُنیا ءِ زِندگیں مردماں چون ھال رس اتگ کہ ھِندو تھنا پہ اے نیکیں کار ءِ مُز ءَ بھشت ءَ برگ بوتگ انچوشکہ مُرتگین وَ دوبر زِندگ نہ بنت! گُڑا شُمارا اے ھال کَے داتگ؟ زاناں تو اِے کِسہ چہ کتابے ءَ ونتگ؟”

گُڑا مُلا ءَ درائینت “ھو من ھم ھیراناں! اے ھال چہ بھشت ءَ اِے دْروگیں دُنیا ءَ کَے آؤرتگ؟ بلے من اِے کسہ چہ مُلا تارک جمیل ءِ تامُربندے ءَ اشکُتگ”

نی زاناں من پہ وتی جُست ءِ جواب ءَ مُناپِکیں مُلا تارک جمیل ءِ گور ءَ برو آں؟ من ءَ وتی جُست ءِ جواب لوٹ ایت